عالمی شہرت یافتہ قوال عزیز میاں کی 19 ویں برسی 6 دسمبر کو منائی جائیگی

عالمی شہرت یافتہ قوال عزیز میاں کی 19 ویں برسی 6 دسمبر کو منائی جائیگی

راولپنڈی : بارعب آواز کے مالک عزیز میاں قوال کی 19ویںبرسی 6دسمبرکو منائی جائے گی ان کا شمار پاکستان کے مقبول ترین قوالوں میں ہوتا ہے وہ اپنی قوالیوں میں اکثر علامہ اقبال اور قتیل شفائی کی شاعری استعمال کرتے تھے۔بھاری بھرکم اور طاقت ور آواز کے مالک عبدالعزیز المعروف عزیز میاں قوال 17اپریل 1942ء کو پیدا ہوئے تقسیم ہند کے بعد انہوں نے لاہور میں سکونت اختیار کی پھر بعد ازاں راولپنڈی منتقل ہو گئے۔وہ پاکستان کے مقبول ترین قوالوں میں شمار ہوتے تھے انہیں ’’ اللہ ہی جانے کون بشر ہے ‘‘ اور ’’ میں شرابی شرابی ‘‘ جیسی قوالیوں نے شہرت کی بلندیوں پر پہنچا دیا۔قوالی کی دنیا میں شاندار خدمات پر حکومت پاکستان نے انہیں 1989ء میں پرائڈ آف پرفارمنس ایوارڈ سے نوازا انہیں شاہ ایران رضا شاہ پہلوی کے سامنے یادگار پرفارمنس پر گولڈ میڈل سے نوازا گیا وہ اپنی قوالیوں کی شاعری خود لکھتے تھے انہوں نے جامعہ پنجاب لاہور سے فارسی، اردو اور عربی میں ایم اے کیا تھا وہ قوال کے ساتھ ساتھ عظیم فلسفی بھی تھے ان کا اصل نام عبدالعزیز تھا جبکہ میاں ان کا تکیہ کلام تھا جس کی وجہ سے وہ عزیز میاں کے نام سے جانے جاتے تھے۔عزیز میاں قوال 6دسمبر2000ء کو علالت کے باعث 58برس کی عمر میں انتقال کر گئے تھے ۔

اپنا تبصرہ بھیجیں