ہرنائی 29جولائی۔ملک کی ترقی کی راہیں بلوچستان سے ہوکر گزرتی ہے ،بلوچستان میں ترقی کا نیا دور شروع ہوچکاہے ان خیالات کا اظہار صوبائی وزیر پی ایچ ای ،واسا حاجی نورمحمد دمڑ نے ہرنائی کے دورے کے موقع پر کیا ،دورے کے دوران انہوں نے ڈی سی آفس میں افسران کے اجلاس کی صدارت کی ،مختلف مقامات پر عوامی اجتماعات سے خطاب اور مختلف شخصیات کی وفات پر فاتحہ خوانی کی اس موقع پرڈپٹی کمشنر محمد عظیم جان دمڑ،عبدالناصر ترین ،عبدالباقی ترین اور دیگر بھی موجود تھے۔صوبائی وزیر حاجی نورمحمد دمڑ نے خطاب کرتے ہوئے کہا کہ ماضی میں ضلع ہرنائی کو خاطر خواہ ترقی نہیں دی گئی ،اور ضلع ہرنائی کو ہروقت پسماندہ رکھا گیا ،موجودہ دور حکومت نے ضلع ہرنائی میں ترقی کا نہ رکنے والا سلسلہ شروع کیا ہے ،ہرنائی میں ترقیاتی کام عوام کی مشاورت سے شروع کئے جارہے ہیں جس کے ثمرات عوام تک پہنچ جائیں گے ۔انہوں نے کہا کہ میر ے حلقے کے تمام عوام میر ے لیے برابر ہیں کسی علاقے سے ناانصافی نہیں کریں گے ،ہم عوام کو جوابدہ ہیں اور عوام کی حقیقی نمائندگی کریں گے ۔
